غزل ۔۔ انور زاہدی

انور زاہدی

کُھلے دریچے ہیں کوئ نظر نہیں آتا
فلک پہ ابر ہو چھایا قمر نہیں آتا
ہوائیں تیز چلیں گھونسلے بکھرتے ہیں
پھر اس کے بعد کبھی کوئ گھر نہیں آتا
فلک سدا سے رہا ظلم پر یونہی خاموش
زمیں اُجڑتی رہی پر ثمر نہیں آتا
ترا خیال مرے دل میں دھڑکنوں کی طرح
دھڑکتا رہتا ہے لیکن نظر نہیں آتا
وہ گھر اُداس وہیں اُس کی راہ تکتا ہے
مگر وہ ایسا گیا پھر سے گھر نہیں آتا
صحیفے آسماں سے جانے کس لئے اُترے
زمیں کے لوگوں پر اس کا اثر نہیں آتا

قیصر منور کے اعزاز میں نشست

نوجوان شاعر قیصر منور کے اعزاز میں

سخنور فورم کراچی اور لائبریری کمیٹی آرٹس کونسل آف پاکستان نے اپنی چھٹی پندرہ روزہ نشست بکا اہتمام آرٹس کونسل کراچی  میں کیاجس کی صدارت معروف شاعراور نقاد سرور جاوید نے کی۔مہمان خصوصی شاعر اور صحافی خالد معین تھے۔جبکہ خوبصورت کلام کے حامل شاعر آفتاب مضطر نے مہمان اعزاز کی حیثیت سے شرکت کی۔نظامت کے فرائض عباس ممتاز ۔۔۔نے سرانجام دیئے

غزل ۔۔ افراسیاب کامل

افراسیاب کامل

پابندِ امتیازِ زمانہ نہیں ہوں میں

تہذیبِ ساختہ کا نشانہ نہیں ہوں میں

پہرے پہ میرے سانپ بٹھائے ہیں کس لیئے

اے چشمِ تاجدار خزانہ نہیں ہوں میں

گنتی کے ساتھ دے جو نوالے غریب کو

اے فکرِ روزگار زمانہ نہیں ہوں میں

جس میں کسی گماں کے اندھیروں کا راج ہو

وہ بے چراغ آئنہ خانہ نہیں ہوں میں

آنسو بتا رہے ہیں مرے دکھ کی منزلیں

کہتی ہے اس کی آنکھ فسانہ نہیں ہوں میں

آنکھوں کا فاصلہ مجھے صدیوں کا ٖفاصلہ

آنسو ہوں اور دل سے روانہ نہیں ہوں میں

تہذیب بھی فریب تمدّن بھی ہے فریب

تم،ایسے مجرموں کا ٹھکانہ نہیں ہوں میں

وہ لو ہے جو چراغ کی محتاج ہے کہیں

جگنو ہوں اور منّتِ شانہ نہیں ہوں میں

ایسی کلیوں سی کلائی ہے کہ سبحان اللہ ۔۔ رحمان فارس

رحمان فارس

عشق کچھ ایسی گدائی ہےکہ سبحان اللہ 

ہم نے خیرات وہ پائی ہے کہ سبحان اللہ 

پاوؑں پڑتا ہوں تو وہ ہنس کے لگاتا ہےگلے

بندگی میں وہ خدائی ہےکہ سبحان اللہ 

شام ہوتے ہی کسی بھُولےہوئے غم کی مہک

صحن میں یُوں اُتر آئی ہےکہ سبحان اللہ  

آنکھ اُٹھا کر مَیں ترے عارض و لب کیا دیکھوں

پاوؑں ہی ایسا حنائی ہےکہ سبحان اللہ 

چہرے پڑھتا ہوں ، کتابیں نہیں پڑھتا اب مَیں

یہ پڑھائی وہ پڑھائی ہے کہ سبحان اللہ  

پا بہ گِل ہوں مگر اُڑتاہوں مَیں خوشبو بن کر

قید میں ایسی رہائی ہےکہ سبحان اللہ 

اک گلِ تر سے ٹپکتی ہوئی شبنم نے مُجھے

آنکھ وہ یاد دلائی ہے کہ سبحان اللہ  

چھونے والا بھی مہکتا ہی چلا جاتا ہے 

ایسی کلیوں سی کلائی ہے کہ سبحان اللہ

سب کی آنکھوں سے بچا کر کسی شرمیلے نے

ہم سے یوں آنکھ ملائی ہے کہ سبحان اللہ 

دِل چُراتا ہےوہ کم بخت بِنا آھٹ کے 

ہاتھ میں ایسی صفائی ہے کہ سبحان اللہ

آج اِک شوخ نے صاحب ! مجھے میری ہی غزل

ایسے شرما کے سُنائی ھے کہ سبحان اللہ 

ہنستے گاتے ہوئے فارس کی اُداس آنکھوں میں 

ایسی خاموش دُھائی ہے کہ سُبحان اللہ 

پرانی گُڑیا ۔۔۔۔۔۔۔۔ عائشہ جاوید

میں کپڑے کی پُتلی

میرے روگ ہزاروں

میرے سنگ نہ کھیلے کوئی

میرا درد نہ سمجھے کوئی

جنم جنم کی کترن میں

جانے کس کی اترن میں

میرا کوئی نہ ماپ شمار

میں کپڑے کی پُتلی

میرے خواب بھی کپڑےجیسے

پھٹے پرانے لیرو لیر

کوئی نہ میرا سنگی ساتھی

کوئی نہ میرا سچا ویر

میں کپڑے کی پُتلی

بوسیدہ کپڑے جیسا

میلا میرا روپ سنگھار

بکھرا بکھرا میرا جیون

دھجی دھجی تن کا تھان

پھیکی پھیکی سی مسکان

میں کپڑے کی پُتلی

بے رنگی اور بے کار

ریشم سا شہزادہ میرا

بھول گیا ہے میرا پیار

اسٹور کے اک کونے میں

پھینک کے مجھ کو لے آیا ہے

نئی نویلی کانچ کی بابی

میری سوتن سرخ سہاگن

لش لش کرتی گوری نار

میں کپڑے کی پُتلی

کوئی نہ میرا پریم ٹھکانہ

میرا کوئی گھر نہ بار

لیاقت علی عاصم کی غزل

لیاقت علی عاصم

جانے کس زخم کی نسبت سے مجھے دیکھتا ہے

وہ غزال آج بھی وحشت سے مجھے دیکھتا ہے

میرے چہرے میں کسی اور کا چہرا تو نہیں

جانے وہ کس کی رعایت سے مجھے دیکھتا ہے

بعض اوقات میں تصویر سا ہو جاتا ہوں

بعض اوقات وہ حسرت سے مجھے دیکھتا ہے

آنکھ چُپ ہے کہ نظارا ہے بدل سکتا ہے

دل کو یہ ضد وہ محبت سے مجھے دیکھتا ہے

چاند تو چھوڑ گیا ہے مجھے عاصم لیکن

آسماں اب بھی اُسی چھت سے مجھے دیکھتا ہے

رحمٰن فارس کی ایک غزل

عشق سچا ہےتو کیوں ڈرتے جھجکتے جاویں

آگ میں بھی وہ بُلائے تو لپکتے جاویں 

کیا ہی اچھاہو کہ گِریہ بھی چلے ، سجدہ بھی

میرے آنسو ترے پیروں پہ ٹپکتے جاویں 

تُو تو نعمت ہے سو شُکرانہ یہی ہےتیرا

پلکیں جھپکائے بنا ہم تجھے تکتے جاویں

دم ہی لینے نہیں دیتے ہیں خدوخال ترے

دم بہ دم اور ذرا اور دمکتے جاویں ۔۔۔!!

توڑنے والے کسی ہاتھ کی اُمید پہ ہم

کب تلک شاخِ غمِ ہجر پہ پکتے جاویں ؟

شیرخواروں کے سے بےبس ہیں ترے عشق میں ہم

بول تو سکتے نہیں ، روتے بلکتے جاویں 

اب تو ٹھہرا ہےیہی کام ہمارا شب و روز

دُور سے دیکھیں تجھے اور بہکتے جاویں !

عشق زادوں سے گذارش ہےکہ جاری رہے عشق

بَکنے والوں کو تو بَکنا ھے ، سو بَکتے جاویں 

اُس کے رُخسار بھی شعلوں کی طرح ہیں ، یعنی

دہک اُٹھیں تو بہت دیر دہکتے جاویں 

فارس اک روز اِسی عطر سے مہکے گا وہ شخص

آپ چُپ چاپ فقط جان چھڑکتے جاویں

حلقہ اربابِ ذوق میں بیادِ مجید امجد خصوصی نشت 11 مئی کو ہوگی

حلقہ ارباب ذوق لاھور کی 75 ویں سال کی تقریبات کا آغاز

حلقہ ارباب ذوق لاھورکے 75 ویں سال کی تقریبات کا آغاز پاک ٹی ہاوس لاھور میں 4 مئی 2014 کے حلقہ کے اجلاس میں کر دیا گیا۔ کیک کاٹنے کے علاوہ حلقہ ارباب ذوق کی خدمات کا تذکرہ کیا گیا۔ شرکا میں ڈاکٹر خواجہ محمد ذکریا، زاہد مسعود،ڈاکٹر اختر شمار، قائم نقوی ڈاکٹر امجد طفیل، ڈاکٹر ضیا الحسن، شفیق احمد خان، زاہد حسن، ڈاکٹر غافر شہزاد سیکرٹری حلقہ، ڈاکٹر افتخار بخاری، منصور آفاق، جاوید قاسم، ڈاکٹر شاہدہ دلاور شاہ،، فرحت عباس شاہ، آزاد مہدی، حسنین بخاری، اعجاز رضوی، کامران ناشط، انور زاہد،سلیم سہیل، جمیل احمد عدیل، ندیم بھابھہ، اور دیگر احباب نے شرکت کی۔۔۔۔۔۔۔

اداسی مجھے اپنی جیسی لگتی ہے ۔۔ عا ئشہ جاوید

میں اداس ہوں

تو کمرے کی دیواریں

جو کبھی ہنستی محسوس ہوتی تھیں

لگتا ہے جیسے

اپنے مدقوق زرد وجود سے

میرا مذاق اُڑا رہی ہوں

پردے ہِل ہِل کر

میری بے بسی پر خوشیاں منا رہے ہوں

چھت سے لٹکا چلتا ہُوا پنکھا

اپنا بوجھ چھت پہ ڈالے

خوشی سے جھومتا دکھائی دیتا ہے

میں اپنے کمرے میں لیٹی سوچتی ہوں

میرا بوجھ کون سہارے گا؟

غزل ۔۔ نصیر احمد ناصر

نصیر احمد ناصر

عکس ٹوٹا ہے بارہا میرا

سنگِ خارا ہے آئنہ میرا

ساری دنیا مِری مخالف ہے

ایک بچہ ہے ہم نوا میرا

تیز بارش کا میں پرندہ ہوں

بادلوں میں ہے گھونسلا میرا

گھر میں مہماں ہوئی ہے تنہائی

بھر گیا ہے برآمدہ میرا

دو چراغوں سے رات روشن ہے

ایک تیرا ہے دوسرا میرا

اوپر اوپر سے ٹھیک لگتا ہے

زخم اندر سے ہے ہرا میرا

پوچھ لینا کسی پرندے سے

سب کو معلوم ہے پتا میرا

میری ترکیب میں ہے سچائی

کون چکّھے گا ذائقہ میرا

کونے کھدرے بھی خوب روشن ہیں

حجرہ ء ذات ہے کُھلا میرا

ہونے لگتی ہے بات جب خود سے

ٹوٹ جاتا ہے رابطہ میرا

کسی منزل کی یاد آتے ہی

چلنے لگتا ہے نقشِ پا میرا

ایک پُرکار کے سمٹتے ہی

پھیل جاتا ہے دائرہ میرا

ایک ٹھوکر سے ٹوٹ جائے گا

جسمِ فانی ہے بھربھرا میرا

تم زمینوں کو ناپتے رہنا

کائناتی ہے فاصلہ میرا

تھک کے واپس چلا گیا ناصر

عین منزل سے راستہ میرا