کربِ عصیاں مضطرب پیشانیوں سے جھڑ چکا ۔۔ ناصر ملک

ناصر ملک

بر سرِ آ شفتگی ہے ماجرائے سوختہ

اک تماشائے جنوں ہے انتہائے سوختہ

اک صدائے العطش نے بھید کھولے ہیں سبھی

ایک دریا بہہ رہا ہے ماورائے سوختہ

عمر بھر منظور تھی جلتے چراغوں کے لیے

رفعتِ شعلہ نوائی کو بقائے سوختہ

لکھ چکا ہے وقت بابِ مرقدِ تہذیب میں

آتشِ تر دامنی سے افترائے سوختہ

کربِ عصیاں مضطرب پیشانیوں سے جھڑ چکا

معبدوں میں اُڑ رہی ہے خاکپائے سوختہ

ابرِ باراں کی سخاوت پر دل و جاں ہیں نثار

چند بوندیں ڈھونڈ لایا ہے برائے سوختہ

کیا طلسمِ جاں کنی تھا لرزہ ءِ ماہِ تمام

اک فغاں دریا سے پھوٹی، شعلہ ہائے سوختہ

۔۔۔۔۔ ناصر ملک ۔۔۔۔۔