نشّۂِ مَرگ سَر چڑھا ہُوا تھا
 |
| افضال نوید |
سُوئے صِحرا تھی خُون کی آندھی
ایک سُولی پہ سَر چڑھا ہُوا تھا
جان لیوا تھی بادۂ تخریب
دیدۂِ چارہ گر چڑھا ہُوا تھا
پھَل مِرے صبرو اِستقامَت کا
شاخ پر بے ثمَر چڑھا ہُوا تھا
ایک طُغیانی میں گِھرا دریا
آنکھ میں رات بھر چڑھا ہُوا تھا
ماہ و انجُم جھُکے تھے بستی پر
اور میَں بام پر چڑھا ہُوا تھا
ساتھ والے مکان کا شُعلہ
کھِڑکیاں کھول کر چڑھا ہُوا تھا
اُس کے اُوپر گُلال جیسے گُلاب
حلقہ سا تا کمَر چڑھا ہُوا تھا
مَیں چکاچوند سے نہ گھبرایا
لَوہے پر آبِ زر چڑھا ہُوا تھا
جب بھی دیکھا ہے میَں نے مِنبَر پر
شخص ِنامُعتبَر چڑھا ہُوا تھا
میرا دریائے عُمر ایک طرف
شہر سے بے خبَر چڑھا ہُوا تھا
بعد مُدّت کے اُس کو ہوش آیا
اُس پہ میرا اثَر چڑھا ہُوا تھا
روزن ِ آسماں کھُلا تھا نوید
گھر کا گھر بام پر چڑھا ہُوا تھا
کوئی تبصرے نہیں:
ایک تبصرہ شائع کریں